الجمعة، 21 أكتوبر، 2011

يبقى إنت أكيد في مصر

ازاى تعرف المصرى

- لو سألت سواق تاكس على عنوان وبدل ما يدلك قالك امشي ورايا.. يبقى مصري.
وعلى فكرة ساعات بيغير اتجاهه عشان عنده رغبة صادقة يوصلك وخايف تتوه
- لو صليت في مكان وبعد الصلاة اللي جنبك مد ايده وقالك تقبل الله.. يبقى مصري

- إذا سمعته بعد أن يضحك كثيرا يقول " خير اللهم إجعله خير " .. فتأكد أنه مصري ...

- لو إتصلت بيه في التليفون , وقال لك من غير مناسبة " كل سنة وإنت طيب " .. فتأكد أنه مصري

- لما تقابل واحد وتسأله وعمره مايقول "ما أعرفش!" جينيوس مصري

- لما تنزل تلاقي واحد ساند على عربيتك واول ما يشوفك يضحك ويقولك لا موأخذه يا باشا
- لو دخلت عليه وكان بياكل ولو حتى عيش وبصل لازم يقولك اتفضل الأكل ويعيدها عليك ثلاث أربع مرات

-. و لما ركبه تخبط فى بعضها من الرعب و هو داخل القسم يعمل بطاقة الرقم القومى ........................ هو ده المصرى

-و لما عربية تعمل حادثة فى الطريق الصحراوى أو الزراعى , و فى ثوانى تقف
لها خمسين عربية ينقذوا المصابين و يعدلوا العربيات و لو اضطروا يشيلوهم من
على الأرض .. هم دول المصريين

- لما تلاقي ناس بتقضي العيد فى المقابر مع حبايبهم اللي ماتوا يبقي أكيد في مصر

- لما تلاقي سيدة في الرايحة والجاية عمالة تدعي لأولادها وتخلى الدنيا
تدعيلهم... تبقى دي أم مصرية وطموحاتها وأحلامها الشخصية فى الحياة إن
ولادها يبقوا مبسوطين

- لو شفت واحد وقف فجأة و هو ماشى فى الشارع
و مد ايده على حتة عيش مرمية على الأرض وقام رافعها لراسه قبل مايحطها جنب
الرصيف... يبقى الواحد (او الواحدة) ده مصرى.

- لو شفت عامل اول ماخد اجرته قام رافعها لراسه و بص فوق و حمد ربنا قبل مايحط الفلوس فى جيبه ... يبقى مصرى.

-لو اديت لواحد فلوس وبدأ يعدها بصوت عالي وبدأ بقوله الله واحد .. ومع
الورقة الثانية : مالوش تاني، ومع الورقة الثالثة: العدد ثلاثة .. يبقي
أكيد مصري ابن مصري

- لو شاورت لتاكس ووقفلك فى نص الطريق عشان تركب حضرتك بمزاج يبقي أكيد مصري

- لما تيجي تدفع الأجرة لواحد أول مرة تعرفه، يحلف عليك تخلي بأه

- لما تلاقي خناقة فى الميكروباس والأصوات عليت كل واحد فيهم بيحلف إنه يدفع للتاني ثمن التذكرة

-. لما تلاقي ست البيت بتحوش برطمانات المربي الفاضية سنين طوال بدون استخدام يبقي أكيد دي مصرية

- لما يكون عندنا ضيوف ويسلموا عشان هيمشوا ويقفوا على الباب يتكلموا ساعه يبقوا مصرين صميمين

- لما تلاقى اننا شايلين اكياس من جميع الاشكال والالوان تحت المرتبه نبقى مصريين

- ولما تلاقى شعب فى اكبر ازمه بيمر بيها ... مابينساش يضحك ويطلع افيهات
ويضحك اللى حواليه
وكل العالم يتكلم عليه وعلى خفته


  يبقى انت اكيد تقصد اعظم شعب موجود على الكرة الارضيه... شعب مصر

  
أنا باكتب الكلام ده وأنا بقي مفشوخ قوي وبأضحك, عشان مهما كان في حاجات أي شعب ممكن يستغربها, احنا كبرنا واتربينا على الحاجات دي.. 

ويا جماعة اللي عايز برطمانات تانج أو مربة فيترك. أو شنط هدايا عيد ميلاد طازة من تحت المرتبة  يقولي عندنا هنا من أيام عم خشبة 

الثلاثاء، 11 أكتوبر، 2011

أي ام ا كلاون

مساء الخير عليكم النهاردة ..

طبعا العنوان النهاردة غريب, إي ام ا كلاون أو أنا مهرج.

وده التعبير الوحيد اللي لاقيته  يعبر عن الشارع المصري

لما نبص على مصيبة اعتصام مسبيرو والهجوم الوحشي من القوات المسلحة اللي المفروض مصرية..
الطريف في الموضوع إن كل مصابين القوات المسلحة ايديهم الشمال مصابة  يا سبحاااان الله كله متعور فياديه الشمال كده
لا يا مسيحيين يا وحشين ليه تعورهم كده أنا مش بحبكم!

المهم إنه الشارع المصري بيتكلم إن دي فتنة طائفية! يا سلاحف أنا فخور جدا بثقافة الشعب المصري الممتازة

الا يرون ان الشارع المصري الآن في حرب مع السلطة, مثل النظام السابق؟
آخر الأخبار بتقول إنه عصام شرف قدم استقالته, اتمنا إنه يمشي , ييجي حد راجل يمسك البلد دي حتى لو لمدة ساعة بس أحس إنه في تغير وحد فعلا بيحب البلد دي ليه سلطة فيها, ولا هو اللي بيحبه البلد دي اللي بيدونو وبيعدوا عالفسيبوك وتويتر؟؟

أنا عن نفسي مصري مسلم, مليش شقيق بس اخويا وصاحبي مسيحي, في مسيحيين أنا باعتبرهم اخواتي فعلا.

بس شكلنا كده نسينا إننا أمة..

اتمنا إننا نرجع ل عقولنا..



وأقول لمحافظ اسوان, إنت أبعد حاجة إنك تكون مسلم أو راجل حتى

واحر التعازي لاخواتنا المسحيين على شهاداء الدين

من اخوكم المسلم..

فليحيا الصليبـ..

ليلة سعيدة انشالله لينا وليكم...

الاثنين، 10 أكتوبر، 2011

هااااا, إنهم يزاكرونني بإبراهيم الأبيض

مساء الخير عليكم النهارده



اولا في حالة استياء عند المسيحيين, أنا من شبرا فيشايف ردت الفعل


ليه العنوان الغريب ده, عشان أنا مش شايف حاجة حصلت امبارح, غير إنه الجيش كان بيتبلطج علشعب

وطنطاوي طلع تلميذ مبارك فعلا
يعني كانوا بيقولوا عالتلفزيون إنه المسلمين والمسيحيين والفتنة 

 واللهِ العظيم ؟؟

قول تاني كده. مين تقصدنى أنا

فتنة آه!

أنا عن نفسي ضد جملة  عودوا إلى ثكناتكم

بس للأسف اعتقد إنه الجيش لازم يعود فعلا إلا ثكناتو

 ده لو هم فعلا هيوفو بالوعود, غير كده

احنا بقى اللي هنذكرهم بإبراهيم الأبيض

بس هيبقى

مينا الأبيض
وعمر الأبيض
وبيشوي الأبيض
ومحمد الابيض

وأهو فتنة بقى


الفتنة والشعب إيد واحداا!


شكرا للزمن اللي بيثبتلنا
إنه مازالت الايادي الحاكمة تستخف بـعقلية المواطن المصري

الاثنين، 26 سبتمبر، 2011

ماذا سيحدث إذا نزل هيروشيما على مصر ؟

ليه؟

مساء الخير عليكو الناهردة الأول

أقول لكم ليه, عشان مثلا كنت النهرده عند الميكانيكي بصلح ال127 توب بتاعتي, فلاقيت إن كل اللي هو عمله في العربية, لا يصلوح للاستخدام الادامي, ده لو هو بيعتبر إنه أنا بني آدم اصلن, يعني هو لو صلاح ميكروباظ ترامكو كان اهتم أكتر..

فـليه الشعب المصري مبيعملش شغله بذمة
كان صنايعي أو حد عنده مهنة محترفة

زي الدكتور
أو المهندس
أو السباك
أو الميكانيكي
أو النقاش
أو المحامي
أو القاضي
أو البقال

بحاول أفهم الفكرة مش عارف 


بس أنا اللي توصلتله بعد الثورة

إننا محترفين في الفتيي

وبس

وإن الحكومة أو الرئيس مش هم بس اللي كانوا وحشين, لأ الشعب كله من أول الشحات للرئيس

بس أنا عندي حل



قنبلة زي نكازوا وهيروشيما

ينزلوا على المحروسة

وينسفلهم 60 70 مليون

عشان ننضف

يا شعب مصر, إنت خايب !

السبت، 24 سبتمبر، 2011

لماذا لا يستحم الشعبـ المصري؟

مساء الخير عليكو النهردة

طبعا أنا مش قصدي نستحمى بالشانبو..

أنا قصدي نستحمى روحانيا..
يعني نجيب جونسونس للروح
لا دموع بعد اليوم

أموت بقى وأفهم ليه احنا كده؟
أنا من منطقة شعبية معروفة, شبرا مصر هي مش شعبية قوي, أنا أقدر أقول هي المنطقة المتوسطة الوحيدة في مصر
لا احنا صفوة
ولا احنا تسول
في غني وفي فقير
في مسلم وفي مسيحى
وطبعا أقوى فتنة
بأمارة إنه أنا عمر كنت قاعد مع مينا وبيشوي بنفطر الصبح

المهم المنطقة دي كانت مليانة فيلال وأشجار, يعني كان عندنا شجرة جوافة ومانجة فيمنور بيتنا هنا, بس جم تجار قطاع غيار السيارات التقيلة أطاعهم

 أكل عيش يا أستاااذ

وماليين الشارع حديد ومش عارف اركن عربيتي 127 توب ايطالي, 

سب دين بـ2000 جنيه كل يوم

وتكلم حد في الصح يضحك

الكوميدي في الموضوع إن لما البلدية جت, زي الكلاب شالوا البضاعة واستخبو



ده بيثبتلي إننا

شعب يخاف مايختشيش


ليلة سعيدة ليكم النهارده

الجمعة، 23 سبتمبر، 2011

محدش فاهم حاجة...

مساء الخير عليكم النهارده

مفيش اختلاف على إنه عصام شرف طالع من الميدان وهو عامل دور مش هاقول وحش
بس أنا عندي مشكلة واحدة,
أنا بقلق من الاسامي الشريفة دي

 يعني كان مسكنا

مبارك
نظيف
عاطف
هلال
بدر
حبيب

فلما جه عصام شرف, كان نفسي اسمه يبقى مدبولي ولا السامخلي
أهو حاجة جديدة زي المطعم اللي من غير ترخيص هنا في شبرا في شارع الورشة اسمه دلع كرشك
أو عربية فول عبده النتن
طب ليه لما بيجي حد اسمه كويس
أداؤه بيكون وحش, مع إن بقى دلع كرشك أكله أحلى من ماكدونالدس,
ناس كتير مش فاهمة يعني إيه حكومة تسير أعمال, بس المفروض هو دور بسيط جدا توفير الغذاء والحماية
فين الكلام ده؟
ما أنا لو بسيط كـ مواطن عادي, أداء شرف والرجالة, مفيش فرق 1% عن حكومات مبارك على 30 سنة, تكاسل تباطؤ ومقدرش أقول خيانة للوطن مع المجلس العسكري اللي مشردنا ومش راضي يقولنا هننتخب امتى أنا عن نفسي برادعاوي فببص بلاقي إنه في ناس طلعت مش عارف منين زي عمنا حمدين أو الراجل أبو دقن مش فاكر اسمه وغيرهم 
وخلاص مسكوا البلد وكل واحد منهم قرر مصير البلد
الناس مش فاهمة حاجة
لأ
ده ماحدش فاهم حاجة
إنه كل واحد من دول طلع قالك أنا هاعمل قانون معرفش إيه
وقانون ابصر إيه
طيب ما احنا كده زي ما احنا من 7000 سنة

الشعب لم يقرر مصيره 
ولكن المرشح قرر مصير الشعب


لأ سوسو مامتك !!

الخميس، 22 سبتمبر، 2011

هل نحن مغيبين؟

مساء الخير عليكو الانهارده

ليه ممكن أقول على الشعب المصري مغيب؟

لان مثلا نبص على التلفزيون المصري

هنلاقي إنهم مثلا في يوم 9/9 والبلد والعة وأنا كنت سعيد جدا بـتكسير الجدار اللي المجلس العسكري ضيع فلوس المصريين في بناؤه, في تلات آيام, بدل مايبنوا مساكن تساعد الشباب الواعد اللي بيتكلموا عنه و واجعين دماغنا بيه..
التلفزيون المصري كان بيعرض مشكلة قرية باين فيها 200 شخص اللي هم ميجوش عدد سكان العمارة اللي أنا ساكن فيها معندهمش مياه الناس ديه لو عاملوه جدول كل يوم 20 شخص يروحوا أقرب قرية فيها مياه البلد هتعيش...

طب ليييييييه؟

عشان ببساطة الناس تقول ياجدعان حرام عليكم ثورة إيه و مش عارف إيه البلد مفيهاش مياه, مش هنلاقي نشرب, و المفارقة بقى.. اللي بيقول كده بيرش مياه قدام المحل بتاعه  ...

أكل عيش يا أستااذ


فـأهم حاجة إننا نحاول نركز على الشعب وننسى أداء الحكومة والمجلس ونبدأ نوعي عشان داخلين على انتخابات وهم مايتلم ...

شكرا

استودعكم الله